Hjólreiðafólk ársins 2016
Það má með sanni segja að hjólreiðafólkið okkar í Tindi hafi staðið sig með prýði hjólasumarið 2016.
Hjólreiðasamband Íslands tilkynnti nýverið á lokahófi þess hverjir hefðu orðið fyrir valinu sem hjólreiðafólk ársins 2016, í kosningu aðildarfélaga sambandsins.
Niðurstaða kosningarinnar var sú að Erla Sigurlaug Sigurðardóttir var kjörin hjólreiðakona ársins og Ingvar Ómarsson hjólreiðakarl ársins, en bæði eru þau úr hjólreiðafélaginu Tindi, einu af fimm aðildarfélögum sambandsins.
Þau hafa bæði átt frábært tímabil og eru vel að heiðrinum komin. Bæði urðu þau Íslandsmeistarar kvenna og karla í fjallahjólreiðum og maraþonfjallahjólreiðum auk þess sem Ingvar tryggði sér Íslandsmeistaratitilinn í Cyclocross hjólreiðum annað árið í röð. Ingvar er einnig fyrsti Íslendingurinn til að keppa á heimsmeistaramóti UCI. Erla Sigurlaug vann Bláalónsþrautina, KIA Gullhringinn, RB Classic og Tour of Reykjavík.
Bikarmeistarar ársins urðu Ágústa Edda Björnsdóttir úr Tindi og Hafsteinn Ægir Geirsson úr Hjólreiðafélagi Reykjavíkur sem sigruðu í kvenna- og karlaflokki í hópstarti, og Gunnhildur I. Georgsdóttir úr Hjólreiðafélagi Reykjavíkur og Helgi Berg Friðþjófsson úr Hjólreiðafélagi Reykjavíkur sem sigruðu í kvenna- og karlaflokki í fjallabruni. Kristín Edda Sveinsdóttir úr Hjólreiðafélagi Reykjavíkur og Ingvar Ómarsson úr Tindi sigruðu í kvenna- og karlaflokki í fjallahjólreiðum, og Margrét Pálsdóttir úr Hjólreiðafélagi Reykjavíkur og Hákon Hrafn Sigurðsson úr Breiðabliki í tímatöku.
Þá voru útnefndir efnilegustu unglingarnir. Í kvennaflokki var það enn og aftur Kristín Edda Sveinsdóttir úr Hjólreiðafélagi Reykjavíkur en hún hlaut viðurkenninguna fjórða árið í röð. Í karlaflokki var það Gústav Darrason úr Tindi sem hlaut viðurkenninguna annað árið í röð.
Innilega til hamingju með þetta allt saman og áfram Tindur!
Myndir: Snorri Þór Tryggvason.